FEF (fur)

Il Forskningscentrum för Europeisk Flerspråkighet (F|E|F) al è nassût intal 2014 par dâ un coordenament unitari a tantis esperiencis di ricercje sociolinguistiche sul plurilinguisim, su la dialetologjie percetive, su la planificazion linguistiche e su la gjeografie des lenghis, za puartadis indevant dai siei membris (in particolâr dai codiretôrs Gabriele Iannàccaro e Vittorio Dell’Aquila), insiemi (sot dal non di Centre d’Études Linguistiques pour l’Europe) o par separât. I nestris cjamps di azion a son: – sociolinguistiche – linguistiche aplicade – politiche linguistiche – educazion linguistiche permanente – psicolinguistiche – dialetologjie – linguistiche storiche comparative – gjeolinguistiche – SIG (Sisteme di Informazion Gjeografiche) linguistiche – terminologjie – linguistiche computazionâl – lessicografie.

Ancje la comparazion fra lis diviersis realtâts sociolinguistichis europeanis e je un dai fins dal Centri, che al vûl fâ riflessions teorichis e metodologjichis su lis fondis de ativitât sociolinguistiche. Par chel, e ancje par judâ i studiôs a informâsi tra di lôr e par permeti di comparâ iniziativis de stesse sorte, il Centri al inmanee in maniere periodiche congrès internazionâi.

Lis nestris ativitâts, pûr mantignint un caratar sientific rigorôs e une metodologjie euristiche indreçade ae scuvierte des situazions politichis, sociâls e psicologjichis reâls, a vuelin dâ plui fuarce ai valôrs sociâi e politics di pâs, paritât e no violence, dai dirits sociâi, de paritât di dirits tra oms e feminis, dai dirits culturâi e linguistics, dai dirits des minorancis (etnichis, religjosis, sessuâls), dai dirits de infanzie, di plurilinguisim, multietnicitât, ecologjie, disvilup sostignibil, par lassâ indaûr la intolerance, il razisim, il militarisim e i nazionalisims.